Балалар хорының алғаш сахнаға шығуы 2013 жылғы 25 желтоқсанда театрдың Камералық залында өткен «Рождестволық концертте» орын алды. Бүгінгі таңда балалар хорының репертуары мынадай спектакльдерден тұрады: Дж.Пуччинидің «Богема», «Тоска», «Турандот», Е.Брусиловскийдің «Қыз Жібек», Ж.Бизенің «Кармен», П.Чайковскийдің «Щелкунчик», К.Орфтың «Кармина Бурана» кантатасы, Т.Бейсенбектің «Самұрық келген таң» музыкалық ертегісі, М.Төлебаевтың «Біржан – Сара», П.Чайковскийдің «Евгений Онегин», Дж.Вердидің «Дон Карлос» және «Аида» , Э.Григтың «Пер Гюнттің саяхаты», Ц.Кюидің «Етік киген мысық». Хор ұжымының концерттік репертуарында қазақ, орыс және шетел композиторларының туындылары бар. Театр қабырғасында балалар Пласидо Доминго, Бруно Казони (La Scala театрының бас хормейстері), Алан Бөрібаев, Абзал Мұхитдин, Ержан Дәуітов, Айдар Әбжаханов, Джузеппе Акуавива, Давиде Ливермор, Михаил Панджавидзе, Юрий Григорович сынды әлемдік өнердің хас шеберлерінен тамаша тәжірибе алудың бірегей мүмкіндігіне ие.

Жыл сайын 1 маусым – Балаларды қорғау күнінде театрдың Камералық залында концерт өтеді, онда хор және балет бағытындағы балалар студиясының тәрбиеленушілері өнерлерін ортаға салып, шеберліктерін паш етеді. Сонымен қатар жас өнерпаздар театрдың Камералық залындағы «Түрлі дауыстар әлемі», «Экран әуендері», «Рождестволық концерттер» және «Балалар театрға шақырады» сынды репертуарлық концерттерге де қатысады. Оқып жүрген жылдар ішінде студия тәрбиеленушілері көптеген фестивальдер мен байқаулардың лауреаты атанды, олардың қатарында «Я и танец» республикалық балалар мен жасөспірімдер шығармашылығының байқау-фестивалі, Dance MIX байқау-фестивалі, «Ритм творчества» өнер фестивалі, «Живи, танцуя» халықаралық би чемпионаты бар. Балалар хоры «Куршинале-2015» халықаралық өнер олимпиадасында «Театр» аталымы бойынша «Патшайымда қонақта» спектаклі үшін (режиссер – Наталья Кагадий) I сыйлық лауреаты атағына ие болды.

2022 жылдың басынан бастап «Астана Опера» театрында балаларға арналған театр қолөнері студиясына балаларды қабылдау басталды, мұнда өскелең ұрпаққа тәжірибелі ұстаздардың жетекшілігімен болашақ мамандық дағдыларын меңгеру мүмкіндігі ұсынылған. Жас өнерпаздардың жұмыстары Камералық зал фойесіндегі тақырыптық көрмелерге қатысады.

«Астана Опера» театрының балалар студиясында дайындық жолын өткен көптеген балалар болашақта өнермен байланысты мамандық таңдап, Қазақ ұлттық өнер университеті, Қазақ ұлттық хореография академиясы, П.И.Чайковский атындағы музыкалық колледж, сондай-ақ Италия, Германия, Австрия және Ұлыбритания университеттеріне оқуға түсті. «Астана Опера» театрының балалар студиясы өскелең ұрпаққа эстетикалық тәрбие берудің маңызды міндетін атқарады.

• опера;
• балет;
• кескіндеме және сурет салу;
• пішу мен тігуді үлгілеу;
• батик және матаға көркемсурет салу;
• ағаш ою.