Қыс кезіндегі жалынды танго

Жер бетіндегі ең тамаша сезімге арналған классикалық және қазіргі заманғы туындылар астаналық меломандарға ұсынылады. 13 желтоқсанда «Астана Опера» театрының Камералық залында «Қысқы махаббат сезімі» атты концерті өтеді.

_DSC2224

Кеште «Астана Опера» театры Симфониялық оркестрінің бірінші скрипкасы, концертмейстері, Қазақстанның еңбек сіңірген қайраткері Бағдат Әбілханов, халықаралық байқаулардың лауреаттары, Ұлт Көшбасшысы -Қазақстан Республикасының Тұңғыш Президенті Қоры сыйлығының лауреаттары – Ермек Құрманаев (виолончель) және Гауһар Тасбергенова(фортеапиано), халықаралық байқаулардың лауреаты, театрдың Симфониялық оркестрінің музыканты Александр Тараскин(флейта) тыңдарманды өз өнерімен қуантады.

Концерт бағдарламасында – С. Рахманиновтың №1 соль минор «Элегиялық үштігі». Атақты композитордың ерте кезеңдегі шығармашылығына жататын бұл туынды, мазмұны жағынан ерекше мәнерлілік, шынайылық пен еркіндікті сипаттайды. Сонымен қатар, ХХ ғасырдағы флейта репертуарынан орындалатын жарқын туындылар: Ф. Пуленктың флейта мен фортепианоға арналған сонатасы, Ж. Массненің «Таис» операсынан «Ой-толғауы», көрнекті балерина М. Плисецкаяға арналған Р. Щедриннің «Альбениске еліктеу» пьесасы, сондай-ақ Д. Шостаковичтің виолончельге арналған сонатасынан тапқыр скерцосы.

Жалынды танго – аргентиналық музыканың жүрегі. Көпшілікке А. Пьяццолланың танымал “Обливион” және “Либертанго” композициялары паш етіледі. Танымал би «тангоның ұлы жаңартушысының» шығармашылығында биік өнер деңгейіне көтерілді. Опустар орындаушылардың өзіндік ерекше өңдеуінде ұсынылады.

Концертті жүргізетін – «Мәдениет қайраткері» Маржан Жәкенова.

Концерт Қазақстанның Тәуелсіздігінің 25 жылдығына арналады. Басталуы 19:00, билет бағасы – 2000 теңге.

Генеральный спонсор

Спонсоры и партнеры