“Богема” операсы

ЖАҢА САХНАЛЫҚ РЕДАКЦИЯ

Джакомо Пуччини

«Богема»

4 бөлімді опера

Либреттосын жазған Джузеппе Джакоза мен Луиджи Иллика

Анри Мюрженің «Богема өмірінен көріністер» романы бойынша

Премьерасы 1896 жылы 1 ақпанда «Реджио» театрында өтті (Турин)

«Астана Опера» театрындағы премьерасы – 2019 жылғы 19, 20 сәуір

 

Қоюшы дирижер – Джузеппе Акуавива

Қоюшы режиссер – Андреа Бернард

Қоюшы сценограф – Эцио Фриджерио

Костюмдер бойынша суретші – Франка Скуарчапино

Бас хормейстер – Ержан Дәуітов, Қазақстанның еңбек сіңірген қайраткері

Проекциялар бойынша дизайнер – Серджио Металли

Жарық бойынша суретші – Винченцо Рапони

Жобаның техникалық директоры – Виктор Караре

Балалар студиясының хормейстерлері – Алтынғаным Ахметова, Әйгерім Макибаева

Қоюшы режиссердің ассистенттері – Текла Гуччи, Еренбақ Тойкенов

Қоюшы сценографтың ассистенті – Риккардо Масирони

Костюмдер бойынша суретшінің ассистенттері – Даниэль Бутар, Анна Верде, Арасель Досмұратова

Ұзақтығы – 2 сағат 30 минут (екі үзіліспен)

Итальян тілінде орындалады

(қазақ және орыс тілдеріндегі синхронды аудармамен)

 

БАСТЫ КЕЙІПКЕРЛЕР ЖӘНЕ ОРЫНДАУШЫЛАР

Мими – Мария Мудряк /

Майра Мұхамедқызы, Қазақстанның еңбек сіңірген әртісі, ҚР Мемлекеттік сыйлығының лауреаты /

Жаннат Бақтай, Қазақстанның еңбек сіңірген әртісі /

Айгүл Ниязова, Қазақстанның еңбек сіңірген қайраткері

Рудольф – Медет Чотабаев, Қазақстанның еңбек сіңірген қайраткері /

Жан Тапин, Қазақстанның еңбек сіңірген қайраткері

Мюзетта – Салтанат Ахметова, Қазақстанның еңбек сіңірген қайраткері /

Альфия Каримова, Башқұртстанның еңбек сіңірген әртісі

Марсель – Сүндет Байғожин, Қазақстанның еңбек сіңірген қайраткері, ҚР Мемлекеттік сыйлығының лауреаты /

Талғат Мұсабаев, Қазақстанның еңбек сіңірген қайраткері

Коллен – Тайыр Тәжі / Болат Есімханов

Шонар – Андрей Борисенко / Ержан Саипов

Альциндор – Армин Бабаян / Тайыр Тәжі

Бенуа – Талғат Ғалеев / Мағжан Аманжолов

Парпиньоль – Бейімбет Таңарықов / Рамзат Балакишиев

Кеден сержанты – Самат Жарылқасынов / Бақтияр Омаров

Студенттер, гризеткалар, қала тұрғындары, саудагерлер, даяшылар, балалар

«АСТАНА ОПЕРА» ТЕАТРЫНЫҢ ОРКЕСТРІ, ХОРЫ, МИМАНСЫ, БАЛАЛАР ХОРЫ

АСТАНАЛЫҚ ЦИРК ӘРТІСТЕРІ

 

ҚЫСҚАША МАЗМҰНЫ

Оқиға Парижде орын алады

I БӨЛІМ. Латын кварталы. Фабрика ғимаратындағы бөлме

Суретші әрі фотограф Марсель мен ақын Рудольф екеуі фотосурет композициясын жасау үстінде. Бой түзеп тұрған Рудольф алаңдаулы, себебі ол аяқталмаған трагедиясын ойлауда.

Бөлме іші өте суық, оның үстіне достардың қарындары аш, себебі тамақ алуға көк тиындары жоқ. Бірақ асқақ арман мен үмітке сенім артқан олар өздерінің өмірде тартқан тауқыметтеріне әзілмен қарауда. Суып қалған пеш Рудольфтің трагедия қолжазбасымен тұтануда.

Ішке суықтан қатты тоңып қалған философ Коллен, оның соңынан азық-түлік, шарап пен отын тауып әкелген музыкант Шонар кіреді. Көңілдері көтерілген достар пәтер ақысын талап етуге келген үй иесін келеке етіп, оны шараппен мас қылады да бөлмеден қуып салады.

Жас достар Рождество мерекесін «Momus» дәмханасында қарсы алып, атап өтпек. Рудольф үйде жалғыз өзі қалады, бірақ мақаласын жазып болған соң, оларға қосылуға сөз береді.

Есікті тықылдатқан әлсіз дыбыс естіледі. Бұл – сөніп қалған майшамына от сұрай келген көрші қыз Мими. Ол бір сәтке есеңгіреп құлап қалады да, Рудольф оған отыруға көмектесіп, шарап құйылған бокалды ұсынады. Біраз отырып, шығып кеткен Мими, артынша қайтып оралады: ол өз бөлмесінің кілтін түсіріп алған екен.

Өтпе желде қыздың да, Рудольфтің да майшамы өшеді; екеуі қараңғыда сүрініп, тепе-теңдігін жоғалтады. Өзіне ұнаған қызды жібергісі келмеген Рудольф кілтті тауып алғанымен, оны қалтасына салып қояды. Жігіт сұлудың мұздай қолын ұстап, ақын жанның күрделі тағдыры жайында сыр шертеді. Мими болса, өз өмірі туралы баяндайды. Шыдамдары таусылған достары Рудольфті шақыруда. Олардың айтқанына көніп, жауап қатқан жігіт Мимимен қоштасудың қолынан келмейтінін түсінеді. Мими Рудольфтің жанына серік болуға қуана-қуана келісім береді. Жолға аттанар алдында олар өз махаббаты жайлы әндетеді.

II БӨЛІМ. Латын кварталында.

Кешқұрым Рождество қарсаңында көше мен алаңдарда шаттық орнаған.

Рудольф пен Мими, Марсель, Шонар және Коллен мерекелік жиын ортасында қыдырып жүр. Жұмсауға ақшаның барына қуанған олар керней, труба және телпек сатып алады. Бәрі ойнап-күліп қуанышқа толы күйде «Momus» дәмханасындағы дастарханға жайғасады.

Отырыстың қызған шағында Марсельдің бұрынғы ғашығы Мюзетта келеді. Оның жанында бай табынушысы, тәкаппар шал Альциндор бар. Богемалық өмірден шаршаған Мюзетта Марсельді тастап кеткенімен, жүрегі оны әлі де ұмытпаған. Ал ғашығының жасаған опасыздығы үшін өш алмақ болған Марсель, қызды байқамаған сыңай танытады. Оның немқұрайлы жүріс-тұрысы Мюзеттаның ашуын туғызуда, дегенмен оған Альциндор бөгет болуда. Ақырында амалын тапқан Мюзетта аяқ киімінің тар екенін сылтауратып, өзінің табынушысын етікшіге жібереді. Альциндор кеткен кезде, Мюзетта мен Марсель бір-бірін құшақ жая қарсы алады.

Осы кезде достарға есепшот беріледі. Ешқайсының да төлеуге ақшалары жоқ. Айлакер Мюзетта ақшаны Альциндордың төлейтінін хабарлайды. Әскери оркестрдің үні естіледі де, достар шығып кетеді. Туфлиді жөндетіп әкелген Альциндор Мюзеттаны іздей бастайды.

Даяшының ұсынған шотына аң-таң болған Альциндор есінен танады.

III БӨЛІМ. Шет аймақтағы теміржол станциясы.

Ақпан айының таңы. Вокзалда теміржол жұмысшылары, көше сыпырушылары; шаруалар мен сүт сатушылар кедендік сержанттың бақылауымен станция арқылы өтуде. «La Gare» дәмханасынан сауық-сайран үнімен қатар, Мюзеттаның күлкісі естіледі. Мими келеді: ол дәмханадан Марсельді іздеп, бір әйелден оны шақыруды өтінеді. Көп ұзамай шыққан Марсельден Мими кеңес сұрайды. Ол Рудольфтің қызғаншақтығынан өмірі адам төзгісіз болғанына шағымданады, алайда бар шыны: күн сайын асқынып бара жатқан ауруы – басты себеп. Рудольфтің жақындап қалғанын байқап қалған қыз жасырынып қалады. Марсельмен әңгіме барысында Рудольф Мимиді жеңілтек әрі тым ерке деп айыптағанымен, артынан шындықты жайып салады: оның ғашығы айықпас дертке шалдыққан және кедейшілік жағдайда жалғыз махаббат оларды құтқара алмайды, сондықтан ол өзінің жалған рақымсыздығы қыздың басқа ауқатты күйеу жігіт іздеуіне мәжбүр етеді деген үмітте.

Мимидің еңіреп жылап, жөтелген дауысы естіледі. Өзінің айтқанына ұялған Рудольф қызды құшағына алып, сабырға шақырады. Осы уақытта Мюзеттаның қылымсыған күлкісін естіген Марсель дәмхана жаққа асығады.

Ащы шындықты білген Мими қоштасуды талап етеді. Қайғыдан егілген қос ғашық көктемде гүлдер бүр жарғанда бір-бірімен біржолата ажырасатынына сөз беріп, қош айтысады. Өзара ұрысқан Марсель мен Мюзетта көрінеді. Марсель қызға түзелмейтін жеңілтектігін айтып жазғырады, ақыры екеуі айырылысып тынады.

IV БӨЛІМ. Латын кварталы. Фабрика ғимаратындағы бөлме.

Арада бірнеше ай өтті. Марсель мен Рудольф қайтадан өз бөлмелерінде – екеуінің де армандары күл-талқан болған, енді оларды өнер шабыттандырмайды. Бұларды тастап, бай көңілдес тауып алған құрбыларын естеріне ала отырып, екеуі де өздерінің сағыныш дерттері туралы сыр шертеді.

Шонар мен Коллен мардымсыз түскі ас әкеледі, бірақ достар дәмді тамаққа толы дастархан басында отырғандай өздерін көңілді сезінеді; барлығы билеп, ән салады. Шонар мен Коллен ойнақы жекпе-жекке шығады.

Көңілді отырыстың нағыз қызған шағында Мюзетта келеді, жанында өзін Рудольфке апаруды жалынған Мими бар, ол қатты сырқаттанған. Достар Мимиді жатқызуға көмектеседі. Бір сәтке науқас өзін дертінен айыққандай сезінеді. Мюзетта өзінің сырғасын, ал Марсель фотоаппаратын сатып, дәрі-дәрмек алу үшін шығып кетеді, ал Коллен өз пальтосын сатпақ болады. Мими мен Рудольфті оңаша қалдыру үшін Шонар Колленнің соңынан ереді.

Мими Рудольфке деген махаббаты теңіздей терең әрі шексіз екенін, оның бар өмірінің мәні екенін мойындайды. Екеуі де бақытты сәттері мен алғаш кездескен күнін естеріне алады.

Кенеттен жөтелден Мимидің тынысы тарыла бастайды; Рудольфтің жан айқайына Шонар жүгіріп келеді. Қалғандары дәрілермен оралып, Мимидің суық қолдарын жылыту үшін жамылғы әкеледі. Мими жамылғы үшін ақырын ғана алғыс білдіріп, Рудольфке өзін жақсы сезінетінін айтып, ұйықтап кетеді.

Мюзетта дұға етеді. Шонар Мимидің мәңгілікке көз жұмғанын байқайды. Рудольф оны құшақтап, атын айтып шақырғанымен, қыз үн қатпайды, қатты ашынған ол сыртқа шығып кетеді.

Генеральный спонсор

Спонсоры и партнеры